شهد نشر المخرج محمد دياب مخرج فيلم اشتباك لخطاب إشادة النجم العالمى توم هانكس على حسابه الشخصى بموقع التواصل فيس بوك تفاعلا شديدا حيث قام أكثر من 6 آلاف متابع بعمل "shere" للخطاب، إضافة لدعمهم عرض الفيلم بعدما دشن دياب هاشتاج "ادعم فيلم اشتباك".
وكان دياب نشر خطاب توم هانكس على الفيس بوك وقال "الرسالة دى من (توم هانكس) بيشيد فيها بالمستوى الفنى لفيلم إشتباك … مبعتليش ايميل لأ ده أهتم لدرجة أنه بعتلى جواب ماضيه بنفسه بيقول فيه أن الفيلم قادر على تغيير الصوره النمطية اللى الغرب بيشوف بيها المصريين..دانيل كريج بطل أفلام جيمس بوند بعتلى رسالة بنفس المعنى... يعنى عكس الكلام بتاع تشويه سمعه مصر".
وأضاف دياب "نفس الفيلم ده هو هو بيتعَرّض فى بلده لخطه لخنقه من قبل ماينزل … طب ليه ميتنمنعش!؟ عشان ده فيلم احتفى بيه مهرجان كان واختاروه فيلم افتتاح قسم (نظره ما) والجرايد العالمية اختارته من اهم 10 افلام فى المهرجان فلو اتمنع هتبقى فضيحة دولية فالحل ينزل من غير ما حد يحس بيه ويتشال بعد يومين من السينما … ويبقى الفيلم الناس هى اللى تجاهلته ونتفادى فضيحة دولية فكرة عبقرية الصراحة تانى هكرر أن المفارقه أن الفيلم مش ضد حد وأنه فيلم بيرصد الهيستيريا والإستقطاب وجوهرة إنسانى … وده كان رأى النقاد المصريين اللى شافوه على اختلاف توجهاتهم".
وأشار فى الرسالة "هعتبر الحملات اللى لم تتوقف من وقت مهرجان كان عن التشويه فى الفيلم وفى صناعه ومنتجيه (بنتعمد عدم الالتفات ليها عشان منسلطش عليها الضوء) صدفه وتأخير تصريح الرقابه لغاية امبارح وتآخير تصريح بوستر الفيلم اللى عامله المصمم العالمى احمد عماد الدين مصمم البوم (بينك فلويد) الاخير فملحقناش نستخدمه هعتبره صدفه ولما الرقابه اصرت تحط جمله قبل الفيلم لها محتوى سياسى وبتحسب الفيلم على جهه ضد التانيه ودى اعتراضى عليها سينمائى فتخيل مثلا انك بتتفرج على فيلم عامل تنويه فى اوله بيفهمك مين وحش ومين كويس والمفروض تفهم ايه!… هعتبر ده تخوف من الهستيريا مع ان السيناريو مجاز رقابيا من غير ولا ملاحظه والرقباء قبل مهرجان (كان) لما شافوا الفيلم دمعوا وحضنونى واجازوه للعرض فى المهرجان بلا ملاحظات لكن لما موزع الفيلم ينسحب قبل نزول الفيلم بأيام ولما كتير من السينمات متحطش بوسترات الفيلم حتى فى (الويك اند) اللى قبل نزول الفيلم فمضطر افكر ان دى مجموعه كبيره قوى من الصدف وان الموضوع مقصود".
واستكمل دياب: "فيلم من غير موزع يعنى فريق كوره داخل الدورى من غير مدرب … كده الفيلم ممكن يتشال من السينما بعد يومين تلاتة من نزوله لو فيه نية سيئة وانا بدأت اقتنع بكده انا بكتب الكلام ده عشان الفيلم مصيره بقى فى ايدكوا انتوا … الجمهور … لو الناس مدخلتش الفيلم فى اول كام يوم فيه احتمال كبير متلاقيهوش ومتشوفهوش خالص … الخطه دى لو نجحت معتقدش حد هيجروأ انه يعمل فيلم ضد الفكر السائد أو يخاطر بأى فكره اصلاً لأن مين منتج هيبقى عاوز يخاطر بفلوسه فى مشاريع بتتوقف قبل ما تجيب فلوسها..اشتباك اتباع فى 20 دوله فى اوربا وامريكا اللاتينه والشماليه وآسيا وهينزل فى شهر سبتمبر فى حوالى 200 دار عرض فى فرنسا لكن النجاح الاهم هو فى مصر وسط الناس اللى الفيلم معمولها فأرجوكوا ساعدونا ان الفيلم يوصل للناس … يوم الاربع 27-7 الجاى يا هيبقى بداية تجربة مختلفة يا نهايتها.. انتوا اللى هتحددوا، واخيراً انا متأكد ان الجهات المتحكمة من الكواليس مش كلها على قلب رجل واحد لأنى بيوصلنى ان فيه ناس على أعلى المستويات فخوره بالفيلم... معرفش مين الجهة صاحبه الفكره العبقرية دى اللى كالعادة هتضرب فى وش اللى فكروا فيها واللى هتعمل فضيحة عالمية أكبر من المنع بس انا متأكد ان الجهة دى بتضر الدولة اكتر ما بتنفعها بالذات لما تخترع معركة وهمية زى معركة اشتباك.