في واقعة غريبة، سارع الفنان خالد الصاوي بالرد على أحد المتواجدين على صفحته الرسمية على موقع "فيس بوك" عندما هاجمه ووجه له سؤالا ساخرا منه لمهاجمته سائق التوكتوك وقال له: "أخدت كام مليون فى أخر مسلسل"، وذلك عقب كتابة الصاوى تعليقا على فيديو سائق "التوك توك": "سواق التوك توك رتبته إيه؟".
وجاء رد الصاوي طويلا ومفصلا بشكل كبير، حيث أن السؤال لم يتعدى ال6 كلمات، في حين جاء رد الصاوي في سطور كثيرة جدا، قائلا: "اشتغلت انت كم سنة؟ كم ساعة كل يوم؟ احتملت الضنك والمناطحة بل والمرض بلا مال قد ايه؟ وكم واحد بعد سنوات حبوا شغلك؟ كم الف حسوا بقيمة ما تعمل؟ بقيمتك يعني؟ لو مت بكره سايب وراك ايه؟ ومن حيذكرك؟ وليه مش حيفتكروك طويلا هو انت ماغوصتش في امالهم والامهم وتبنيتهم لدرجة عاوزين يضحكوا او يبكوا معاك؟ مش موهوب في دي طب موهوب في ايه اكيد ربنا ادانا عطايا بس هل دورت؟".
وأضاف الصاوي: "طيب قبل ما لسانك يخونك سألت خالد من امتى شقيان؟ طيب فاهم انت دورة المال ماشية ازتي؟ حلو يعني فاهم اني باخد منك بلاش منك من عيلتك ومجتمعك نقود يمنحها كل واحد بمزاجه -اصحا- لأنه عاوز سلعة "ترفيهية" عشان تفهمها.. وبالتالي مش باخد رزق كان جاي من الارض للناس ووقفت حوشته مثلا (ومع ذلك دافعت عن الغلابى وخاطرت بكل مكسب اللي يسأل ما يتوهش!) ومش باخد من ضرايبك ولا المعونات اللي جايالك. اقرا تاني كلامي وابق فكر قبل ما تتكلم، وبص شمال ويمين قبل ما تتحنجل ع المزلقان يا برنس)".
وتابع الصاوى: "وبالروح دي يا بني لا تقدر تبقى قد واحد في المية مما جاهد خالد نفسه ومحيطه فيه ولا تقدر تضحي نص في المية، مثال واحد واسأل: ثاني يوم بعد جمعة الغضب كنت المفروض سأوقع بكام؟ احلم لا احلم.. طيب انا قبلها بكم سنة كنت مديون ب40 الف ج وكنت حتجنن لأنه مبلغ شبه اربعين مليون كده النهارده والحمد لله، المهم.. كنت سأوقع بعد نجاحات متلاحقة ب 5 مليون.. وصممت انزل الثورة وانا واخد عقار انترفيرون للكبد. سم ناقع.. وكنت بحمس الناس تقف وانا بقع. انت.. ما تقدرش تبقى اي حاجة في ملحمة خالد لما تنجح تبقى فاصل في سهرة ابق كلمه بالعنجهية دي. ملحوظة.. كل ده ما حكيتوش لأني مش ببيع بمواقفي ببيع منتجات جهدي اي سعيي. توكل على الله.".
يذكر أن أخر أعمال خالد الصاوى مسلسل "هى ودافنشى" مع النجمة ليلى علوى، فى موسم رمضان الماضى، حيث أنه يواصل فى تصوير فيلمه الجديد "أخلاق العبيد"، مع الفنانة الشابة يسرا اللوزى، ويجسد "الصاوى" ضمن الأحداث شخصية رجل أعمال يعانى من اضطراب نفسى، يتعرض لمواقف معينة تغير مجرى حياته بالكامل.
ويشارك فى بطولة الفيلم يسرا اللوزى وسلوى محمد على وسارة سلامة وكارولين خليل ورامى غيط ولطفى لبيب ومحمد شرف، وهو فكرة وإنتاج حسين ماهر، وسيناريو وحوار عصام الشماع.