كخطوة جديد لمواكبة التقدم التكنولوجى فى مصر والسعى لإيجاد حلا لتلك المشاكل التى أثارت جدلا فى الفترة الأخيرة وعلى رأسها مشكلة الفواتير، اتخذت وزارة الكهرباء قرارًا أمس بتفعيل خدمة "واتساب الكهرباء" على رقم 01270003430 لاستقبال شكاوى المواطنين وبحث إمكانية حلها، وحددت وزارة الكهرباء شروطًا للشكوى المقدمة عبر "الواتساب"، حيث يجب أن تتضمن الرسالة صورة لعداد الكهرباء وصورة لآخر إيصال تم دفعه وقراءة العداد الحالى.
وهناك رسائل من قِبل المواطنين ستكون على رأس الشكاوى المقدمة لوزارة الكهرباء عبر خدمة "الواتساب".
"علاء عطية.. فواتير الشهر اللى فاتت اللى جت غالية"
يقول علاء أن أول شكوى سيرسلها إلى رقم واتساب الكهرباء المخصص للشكاوى ستكون عن الفواتير الذى ارتفع سعرها خلال الثلاثة أشهر الماضية، حيث ارتفعت الفواتير بشكل أصبح مؤرّق له، ويضيف علاء "هقولهم على الواتساب إن الفواتير غالية علينا ومبقناش قادرين ندفعها، معندناش تكييف ولا أجهزة كهربائية كتير يبقى ليه ندفع فاتورة للشهر الواحد بـ300 جنيه؟".
"محمد إبراهيم.. عايزين المحصل ييجى يقرأ العداد بضمير"
يقول محمد أنه يريد أن يأتى محصل الكهرباء باستمرار كل شهر ويقرأ العداد جيدًا؛ حتى لا تأتى الفواتير بأسعار مبالغ فيها، مضيفًا أن محصل الكهرباء لا يأتى بشكل مستمر لذا ستكون هذه أول رسالة لوزارة الكهرباء، ويضيف محمد قائلا "انا هكتبلهم وأقولهم إن لازم ينبهوا على محصل الكهرباء يقرأ كويس عشان اللى بيحصل فينا حرام".
"سماح أمين.. هقولهم ياريت تعينوا ستات محصلات كهرباء عشان أمننا"
تقول سماح أنها نظرًا لجلوسها طوال الوقت فى منزلها وحدها فإنها تخشى دائمًا من دخول محصل الكهرباء لمنزلها؛ لكى يكشف على العداد الكهربى، مضيفة "هبعت لوزارة الكهرباء على رقم الواتساب هقولهم عينوا محصلات كهرباء عشان أمننا وسلامتنا، ودى حاجة هتنفع البنات اللى ساكنة لوحدها فى الشقة".
"محمد فتحى.. هقول لوزارة الكهرباء مش عايزين عداد بكروت شحن"
يقول محمد فتحى أنه لا يرغب فى استخدام العداد الكهربائى الذكى الذى يتم شحنه بكروت شحن، فهذا العداد سيكلفه الكثير شهريًا، كما أنه سيكون صعب على من يستخدمونه من الأميين، مضيفًا "مش عايزين عداد بكروت شحن، افرض الشحن خلص واحنا معناش فلوس نموت يعنى ونقعد فى ضلمة".
"بسمة محمد.. مش عايزين الكهرباء تقطع علينا فى الصيف"
أما عن أول رسالة سترسلها بسمة إلى واتساب الكهرباء فهى التنبيه عليهم بأن لا يفصلوا الكهرباء فى فصل الصيف عن المنازل؛ وذلك منعًا لتضرر من يقنطون فى أدوار عالية والتى يتم بعدها عطل الأسانسير، كما أن ارتفاع درجة الحرارة فى الصيف يشرعها بالتعب، وتضيف بسمة "مش عايزين أزمات السنين اللى فاتت تتكرر مش عايزين قطع كهرباء بالساعات علينا".
"محمد مصطفى.. الشقة مقفولة وفواتير غالية بتيجى"
ويقول محمد مصطفى أن لديه شقة مقفولة لا أحد يعيش فيها كان قد أغلقها منذ فترة كبيرة، فهو يسكن فى احدى المنازل الجديدة بينما يدفع فواتير كهرباء للشقة التى لا يسكنها أحد غالية، ويضيف محمد "ادفع فواتير كهرباء ليه وانا مش فى الشقة ساكنها أشباح مثلا؟، هشتكى لوزارة الكهرباء ويارب يستجيبوا للشكوى".