أغرب توفيق "راسين فى الحلال".. برسيم وميه.. والنتيجة "مبروك نعجتك حامل"

الحاج محمد حافظ "نقيب غنامين" كوم حمادة عشرة 47 سنة مع "الخرفان".. الحب يأتى مع "المأمأة" أحيانا فى عالم مواز بعيدا عن عالمنا، وفى ازدحام من نوع آخر ممتلئا بضجيج "المأمأة" والبحث عن عيدان البرسيم، يتواجد الرجل الخمسينى محمد حافظ بجوار غنمه بقرية كوم حمادة بمحافظة البحيرة، يتابع خطواتها وحركاتها العشوائية، التى يرى هو تنظيمها بعين أخرى، يأكل وسطها وينام بجانبها حتى تشعر بالأمان ويشعر هو الآخر به.

لم يحصل على لقب "نقيب الغنامين" من نقابة غير موجودة، لكنه حصل عليها من أهالى القرية الذين شهدوا على عشرته الطويلة مع الغنم وخبرته الكبيرة بأحوالها، فكانت الـ47 سنة التى قضاها مع الغنم كافية لإعطائه هذا اللقب عن جدارة واستحقاق.

يحكى الحاج محمد حافظ صاحب الـ56 سنة عن حكايته مع الغنم ويقول: "الناس مش بتفرق بين الغنام وراعى الغنم، أنا الناس بتيجى تجيبلى النعجة عشان أجوزها وأرجعها لهم حامل، وأراعيها هى وعيالها، وأربيهم وأكبرهم لحد ما يعوزوهم، وبوفرلهم مكان الإقامة وبشتريلهم مرعى فى أراضى البنجر عشان ياكلوا فيه، وطبعا بطعمهم وأجيبلهم دكتور يعمل لهم كشف طبى على طول"، وأضاف: "النعجة بتفضل معايا لحد ما تتجوز وطبعا كل واحدة ليها ظروفها، يعنى ممكن واحدة تاخد 10 أيام، وواحدة تاخد أسبوع دى حاجة بتاعت ربنا".

وعن معاناته مع الغنم بكلمات كساها شقاء السنين يقول "الشغل فى الغنم شقى، واللى يسرح بالغنم لازم يكون شديد وجامد ويتحمل، ولو مش كدة يبقى بلاش منها، ولازم يتحمل المرض لأنه لازم يمرض ولازم يعافر عشان يصمد معاهم"، مضيفا "رغم كل ده أنا بحب الغنم بتوعى أوى، هو فى حد يكره ماله، وعندى أكتر من 25 رأس غنم وابنى شغال معايا لحد ما يلاقى وظيفة، وطبعا دى حاجة مش مضمونة".

وعن مكسبه من الغنم يقول: "عشان نجوز النعجة باخد 100 جنيه، ولو محملتش باخدها تانى ببلاش"، وأضاف "بقضى يومى كله مع الغنم، باجى من 8 الصبح وأفضل لحد الساعة 6 وابنى بيفضل معاهم بعدى عشان أبقى متطمن عليهم".

تواجد الحاج مختار عبد الستار الذى يعمل هو الآخر فى نفس المجال، وفى السياق ذاته يقول "أنا بقالى 12 شهر مروحتش بيتى، عشان بفضل مع غنمى هسيبهم لمين، دانا لما نعجة بتموت بحزن عليها أوى"، وأضاف: "تربية الغنم مكلفة أوى والحكومة مش حاسة، جركن دوا الديدان بقى بـ400 جنيه، ونفسنا الحكومة تبصلنا شوية، احنا بنوفر للبلد لا بنطلب وظيفة ولا غيره، كنا بناخد التطعيمات مجانا دلوقتى بقينا بندفع 3.5 جنيه على الراس الواحدة، ده حرام".

وعن تواجد الكلب بجوار الغنم دائما يقول الحاج مختار: "الكلب بيحمى الغنم، وعارفين بعض كويس أوى، والكلب مايخليش ولا ديب ولا تعلب يقرب لغنمه، وكمان ميخليش غنمة غريبة تدخل عليهم".