جدة.. بريشة

القصة ما انتهتش لغايت كده كان فى مفأجاة خلتنى البرج اللى فاضل من دماغى يطير مافيش حد فينا ما يعرفش المثل اللى بيقول أعز من الولد ولد الولد.. سمعته كتير وأنا صغيرة وأنا متجوزة ولما خلفت ولما ولادى كبروا.. كنت باستغرب وبأضحك.. صدقونى بأضحك.. وطول الوقت كنت بأقول إنه مافيش فى حب أكبر من حبنا لأولادنا!!! لغايت ما ابنى اتجوز وجاب أحلى بنوتة فى الدنيا.. وقتها حسيت إن برج من عقلى طار.. وبقيت مش عايزة أبعد عنها وحسيت نفسى جدة فى منتهى الرخامة. من لحظة ولادة ليلى وأنا حاسة أحاسيس غريبة وعجيبة.. مش زى كل الستات إنى كبرت بقى وبقيت جدة.. وراحت على.. أقولكم حسيت إنى بقيت أصغر وعندى قدرة رهيبة على اللعب والتنطيط يمكن أكتر مما كنت وقت ما خلفت ولادى وأنا فى عز شبابى.. زى ما تكون دبت فى روحى كل طاقة الشباب رغم إنى كنت جدة صغيرة بالمقارنة بالجدات المتعارف عليهم.. ما كنتش باتكسف لما الناس بتعرف إنى جدة بالعكس كنت فخورة إنى ابنى البكرى جاب لى بنوتة زى القمر.. كنت شايفة إن ده إنجاز كبير مش لابنى بس.. لكن لى أنا كمان.. تعرفوا إحساس إنك على رأسك ريشة كنت حاسة بالإحساس ده لدرجة إنى اتغريت بنفسى.. وكنت كل ما أقعد فى أى تجمع أحب أجيب سيرة ليلى حفيدتى الأولى بفخر وأراقب الناس وهى بتستغرب من جرأتى إنى بأقول على نفسى كبيرة فى السن.. القصة ما انتهتش لغايت كده كان فى مفأجاة خلتنى البرج اللى فاضل من دماغى يطير.. جميلة حفيدتى الثانية كانت مسؤولة عن التغيير الفظيع اللى حصل لى.. ما بقتش أطيق أكتر من يومين ولازم أشوفها.. والحقيقة إن كل حفيدة لها مذاق خاص ما تقدرش تقول بتحب مين أكتر.. ضحكة جميلة بتجنينى.. وطريقة كلام ليلى بتأسرنى.. وبقيت أفتكر يا ترى هافضل كتير كده مع كل حفيد يجيى لى.. سواء من ابنى ولا من بنتى لما تتجوز إن شاء الله.. أقولكم على حاجة أعتقد إن الموضوع خلانى أفكر فى مصداقية المثل اللى بدأت بى كلامى واللى بيؤكد أن معزة الحفيد تفوق معزة الابن بمراحل رغم أنى لوقت قريب كنت شايفة إن المقولة ده فيها كثير من المبالغة.. حاولت أفسر تعلقى بليلى وانبهارى بجميلة ما لقتش أى تفسير منطقى إلا إنى باشوف فيهم ولادى اللى هما امتداد لهم.. يعنى حبى لأحفادى نابع من تعلقى بابنى بجنون.. ووصلت لنتيجة فى منتهى الضحك.. إنى بحبهم علشان هما ولاد عمر ابنى.. وبحب عمر لإنه جاب لى هديتين من عند ربنا.. يعنى حبى لابنى السبب مش مجرد إنهم أحفادى.. ممكن أسال سؤال تانى يا ترى لو ما كنتش بحب ابنى بالطريقة ده كنت اتعلقت بأحفادى بهذه الطريقة.. أم أننى سأحبهم فى كل الأحوال.. بصراحة أنا شايفة إن العودة لأصل الأشياء هو الأكثر صدقا.. فاذا كنا بنؤمن إن أعز من الولد ولد الولد.. فأنا شايفة إن نظريتى التى أؤمن بها أعز من روحى وحياتى ولادى عمر وفيروز..