حب نفسك واللى حواليك

أسهل حاجة إن إحنا نشوف الوحش اللى فى الناس، وفى أى حاجة حولينا، أسهل حاجة إن إحنا نزعل من حد ونتخانق ونقاطعه، اتعودنا نشوف الوحش قبل الحلو ونصدر أحكامنا على الناس من غير ما نعرف القصة من كل جوانبها، أدينا لنفسنا حق الحكم على الناس والمواقف ونسينا إن إحنا ممكن ساعات نبقى قارئين الصورة غلط. يحصل إيه لو حاولنا ندى لنفسنا فرصة إن نشوف الحلو اللى فى اللى حولينا الأول؟ نشوف النور قبل الضلمة، ندى فرصة لنفسنا نسمع اللى قدمنا بدل ما بس نسمع نفسنا، نسمعه من غير ما نحكم عليه، لو تعبان نحاول نساعده ولو غلط فينا ممكن نتعاتب ونتصالح. لو ابنك مش شاطر فى المدرسة حاول تشجعه مش تقوله إنه فاشل، شوف هو شاطر فى إيه، وحاول تنمى له موهبته مش تحبطه. لو فضلت تقوله إنه فاشل حايطلع بجد فاشل لما يكبر، شجعه وصاحبه وحبه، محدش شاطر فى كل حاجة، إعمل كده مع أصحابك وزمايلك فى الشغل، شجعهم ماتكسرش مقاديفهم. ممكن اتنين قدمنا يبان عليهم فى قمة السعادة والتفاهم ما نبصلهمش ونحسدهم علشان إحنا مان عرفش الحقيقية إيه أو قد إيه المجهود اللى بيبذلوه والحاجات اللى بيعدوها ويتغاضوا عنها علشان يكملوا حياتهم مع بعض، بالعكس لازم نحتذى بيهم، لإنهم مثال للنجاح والمثابرة. كل حاجة فى الدنيا مش بتيجى بالساهل، أى نجاح بيجى قبله مجهود وشغل وسهر وتعب، الناس بتبص بس على النتيجة على أساس إنها جت كده بالحظ وبيتناسوا المجهود المبذول، أى نجاح وراه قصة كفاح تدعوا للفخر. لو اثنين اتخنقوا نلاقى كل حد، وأى حد يحب يتدخل وبدل ما يحلها يولعها، يحصل إيه لو دخلنا نحل ونحاول نصلح مش نوقع؟ حاول تعمل الخير صدقنى حاتحس بسعادة و راحة. فى الآخر لو عودنا نفسنا نشوف الحلو والخير اللى فى الناس والمواقف حانتعود نشوف الحلو اللى فينا إحنا، كتير مش بندى لنفسنا حقها، ثق فى نفسك وفى قدراتك، كل يوم بيعدى علينا هو فرصة جديدة، حب نفسك وحب اللى حواليك.