وإنت كده مبسوط؟

وإنت كده مبسوط؟ اللواء خالد سعيد، محافظة الشرقية، فخور بتعيين شباب خريجى كليات الاقتصاد والعلوم السياسية وآداب إنجليزى وهندسة، عمال نظافة بالمحافظة، بس عندك حق يا سيادة المحافظ، ما إحنا لازم نستفيد من الشباب، خلى الباشمهندسين يكنسوا ويغنوا ملعون أبوك يا فقر يا حاوجنا للحكومة.

يا نكباتك يا مصر السيدة غادة والى، وزيرة التضامن الاجتماعى، فخورة برضه بتخصيص 91 مليون جنيه من الموازنة للصرف على «النكبات»، الله ينور يا افندم، الحكومة عاملة اللى عليها وصارفة ومكلفة، بس يا ريت نصرف 91 كمان عشان نمنع النكبات دى، عشان الواحد حاسس إنه عايش فى نكبة، مش فى دولة.

الحرية للبهوات الجنرال جمال محمد حسنى مبارك، كان لابس تى شيرت «NIKE» وحضر بيه العرض العالمى للأسطورة مايكل جاكسون فى أحد مولات القاهرة الجديدة، هى دى مصر، وسلم لى على ثورة يناير، وأهو بكره تقول كانت ذكرى وعيشنالنا يومين.