ليالى البرنس فى هاسييندا

ليالى البرنس فى هاسييندا تروح الأيام، وتيجى الأيام، وتصبح 25 يناير نكتة قديمة، و«فيلم بايخ» عن هوجة فاشلة، قام بها شعب قصير النفس، يحب «الطلسقة» حتى فى الثورات، ويظهر البرنس جمال مبارك مصفقا ومستمتعا بنغمات «آه لو لعبت يا زهر»، فى الساحل الشمالى، وهو يشاهد أحد عروض الرقص الشرقى، ويلتقط الصور السيلفى مع الموجودين، كأنه نجم النجوم، من حقنا أن نفخر بمصر التى وصلنا إليها، وربنا يعوض آلاف الأمهات ممن استشهد أبناؤهن، أو فقدوا أعينهم، معلش، الزهر ملعبش.

العبوا مع بعض بص يا سيدى، عندك أحمد زكى بدر وزير التنمية المحلية، ومحمد عبدالظاهر محافظ الإسكندرية، متخانقين، بسبب اتهام المحافظ للوزير بإهدار مليار جنيه على الدولى، والمطالبة بإقالته، زكى بدر زعل، عملوا «قعدة» عشان يصلحوهم، قام المحافظ اتأخر ساعة، قام زكى بدر زعل واعتبره ما بيحترمهوش، قام وزراء التموين والنقل والتخطيط ورئيس الغرفة التجارية حاولوا يقعدوهم سوا، بس زكى بدر قام مشى وهو «حرنان»، معلش، العبوا مع بعض، وفى داهية المليار جنيه بتاع الشعب، كله بالحب.