راحت فلوسك يا صابر

راحت فلوسك يا صابر فى 23 أغسطس 2014 دخل شوية ملثمين على شركة «ويسترن يونيون» لتحويل الأموال فرع المعادى بالأسلحة، واستولوا على 123 ألف دولار، وهربوا، وتروح الأيام وتيجى الأيام، واليومين دول جهات التحقيق قالت مفيش «وجه» لإقامة الدعوى الجنائية لعدم معرفة الفاعل، يعنى ألف مبروك ع الحرامية، وحلال عليهم، مفيش أسهل من كده فى بلد الأمن والأمان، انت قلت لى بكام الدولار النهاردة؟! عشان بس الواحد يعرف يقر عليهم بضمير. عليه 510 سنين سجن أجمل ما فى مصر أن بها قوانين تحكم كل شىء، وأعجب ما فى مصر أن تطبيق القانون يتم بالمزاج، وأنه لا يركب فوق القانون إلا من يفترض فيه تطبيق القانون، ما علينا، المهم إن إدارة تنفيذ الأحكام بقطاع الأمن العام ضبطت رجل الأعمال سامى أبوذكرى، الهارب من 1270 حكما قضائيا متنوعا، وعليه أحكام بالحبس 510 سنين، وتسأل نفسك هم قبضوا عليه دلوقتى ليه؟ ما قبضوش عليه ليه بعد أول ولا عاشر حكم؟ بلاش، طب بعد الحكم رقم 700 أو 950 أو الحكم رقم 1100؟ اشمعنى الحكم 1270 يعنى؟.. صحيح، بلد العجايب.