ميران حسين تكتب : ضد المنطق..اتفاقات الجواز

فى المجتمع عادات وأعراف تجن العاقل ومافيش حد بيقف لحظة يفكر فيها .. عادات عقيمة عفى عليها الزمن .. عادات لا تتماشي مع زمنا ده مُطلقا ..عادات لو فكرنا لحظة فيها هنعرف أننا مجانين

مين قال أن من المنطقى أو الطبيعي الأتفاقات إللى بتتعمل للجواز دي ؟!
مين قال أن أهل العريس وأهل العروسة همه إللى بيقرروا بيت ولادهم هيكون فيه أيه وهيتفرش أزاى !!
مين قال أن العريس والعروسة يقعدوا لاحول لهم ولا قوة بين الأهل ويسيبوا مصيرهم
يتحدد على رغبات أهاليهم .

بأى منطق لازم يتجاب حاجات مش هيستخدموها وثمنها ألوف الجنيهات !!
نيش وماتسألنيش ليه أوهيتعمل بيه أيه بس هو كده كده لازم يتجاب ورأيكم فى الموضوع ده مش مهم ولا حد أساساً هيأخد بيه فريحوا دماغكم وأسكتوا لأن الرأى الأول والأخير فى الموضوع ده بيرجع للست الوالدة أمك والست الوالدة أمه :)
طقم سرفيس أو طقمين أنتوا ونصيبكوا بقي ، ده غير الكوبايات والكاسات الكريستال والفناجين والمعالق والشوك والسكاكين المدهب

وده بقي إللى بيسموه الشئ لزوم الشئ .. يعنى حاجات لازم تتجاب أومال النيش هيتملي بإيه ، يعنى مثلا هنجيبه ويفضل قاعد فاضى وحداني لا طبعاً لازم نملاه ومش مهم هندفع كام يعنى هي جت على فلوس الحاجات دي مثلاً ، أهم حاجة أننا نفرح أهالينا وأنا شخصياً مش عارفة بنفرحهم بإيه ده أحنا بندفع دم قلبنا بس هنقول إيه لله الأمر من قبل ومن بعد

من الآخر الحاجات دي من يوم مابتتجاب وبتتحط في النيش وبيتعلق عليها ممنوع الأقتراب أو اللمس ، دي حاجات بتفضل متحنطه فى النيش لحد ما العروسة بتعجز وبتورث ده كله لبنتها لما تتجوز وبرضه بنتها هتورث الحاجات دي لبناتها والجدير بالذكر أن النيش بإللى فيه بيكون بحالته ماهو ماحدش لمسه ولا حتى قرب منه يعنى فبريكة آة والله زي مابقولك كده :)

فكرة أن الواحد يدفع فى الكلام الهايف ده مالايقل عن 20ألف ولا حتي 30 ألف ويمكن دلوقتى أكتر من كده لمجرد أنه يحبسهم فى فاترينه ويكتب عليها ممنوع الأقتراب أو اللمس ده فى حد ذاته درب من دروب الجنون

خلصنا العفش ندخل بقى على المهر والمؤخر والشبكة والفرح
ودول بقى بيندرجوا تحت بند بنت خالتك وبنت عمك مش أحسن منك أما بالمثل أو أكتر
وكأن العروسة دي بقرة فى سوق الثلاثاء أو عروسة حلاوة بتتباع للى يدفع ثمن أكتر
لو فكرنا لحظة ونشوف أم العروسة والعريس ولا حتي جدة العروسة ولا العريس لما أتجوزوا جالهم شبكة أيه طب أدفعلهم مهر ومؤخر قد إيه ؟؟
طب بلاش ده كله حد يقولى البيت أتفرش أزاى والأجهزة الموجودة فيه كانت أيه ؟؟
حد يعرف طيب الفرح أتعمل أزاى ولا فين .. طبعاً كله كان فوق السطوح يا سعادة البيه ولما أتطوروا شوية عملوه فى الشارع أنما بنتهم عيب لما تعمل الفرح على الضيق لازم الفرح يتعمل فى أكبر فندق فيكي يا مصر وحدث ولا حرج

الغريب فعلاً أن ـهالينا نسيوا أنهم بدأوا حياتهم بطشت أوغسالة برميل وبنوا حياتهم يا أما في بيت أهاليهم ياما بدأوها بالسلف وجمعيات وخلافه والأغرب بصراحة أنهم نسيوا برضه همه وصلوا لأيه دلوقتى بقى عندهم شقة تمليك وعربية وشالية بيصيفوا فيه أنما بالنسبه لبنتهم لازم تدخل على الجاهز ماينفعش تعدي بالتطور الطبيعي للحاجة الساقعة زيهم كده .


خلصنا من من ده كله وربنا عداها على خير ندخل بقى على المهم إلا وهي القايمة وما أدراك ما القايمة دي فى حد ذاتها ممكن تهد أى جوازة وتقيم حروب وعواصف وأعاصير وبراكين كمان بين العيلتين ، ليه وأيه السبب إللى ممكن يخلى أهل العروسة يعملوا كل ده ؟

ببساطة أهل العروسة عايزين يضمنوا حق بنتهم والحق ده بيضمن طبعاً من خلال القايمة وأهل العريس شايفين أن إللى بيقولوه أهل العروسة ده جنان وماحدش يرضى بيه.

والصراحة لو حد فكر للحظة هيلاقي أن عمر القايمة ما بتحمي ولا بتضمن حق حد
يوم مابيتخرب البيت يا سادة بيكون المكان الطبيعي للقايمة على حيطان المحاكم وهمه بيتخانقوا على شوية الخشب إللى مالهمش أى قيمة .

الواحدة يوم مابتزهق وبتفكر تبيع بتبيع كل حاجة ومش بيهمها شوية خشب مكتوبين فى قايمة ، ماحدش بيفكر أن الواحدة لو كرهت بتبيع الدنيا علشان تخلص من الشيطان إللى فى خلقتها ده


أهل العروسة لازم يفهموا حاجة مهمة جداً الضامن هو الله وبدل مايفكروا فى قايمة تضمن حق بنتهم لازم يفكروا فى عريس يضمن كرامة بنتهم ويراعي فيها ربنا

كل الأفكار البالية إللى مأثرة على الأهالى مابتحميش بنتهم ولا بتخليها سعيدة
كل الأفكار البالية إللى مأثرة على الأهالي وبيقرروا بيها حياة أولادهم وكأن ده حق مكفول ليهم مش صح وبعيدة كل البُعد عن المنطق

فلوس بتتدفع فى الهوا مالهاش أى لزوم ولو العريس أو العروسة حاولوا يتناقشوا مع أهلهم بيكون الرد " الناس يقولوا علينا أيه لو عملنا كده " .
هما مين الناس دول وأيه أهمية رأيهم فى أى شئ فى حياتنا
مانركز شوية فى إللى بنعمله
نيش وطقم سرفيس أطقم كوبيات وكاسات وفناجين ، معالق وشوك وسكاكين ، قايمة وشبكة وفرح وقبلهم حنه وتنجيد ودي جي وكل ده علشان نتباهي قدام ناس لا بيعجبهم ولا هيعجبهم أى شئ .

عايز تتجوز هتدفع دم قلبك علشان ترضي أهلك على شوية تقاليد وأعراف باليه لا تسمن ولا تُغني من جوع .

عايز تتجوز علشان تكمل نص دينك .. أحب أطمنك بإللى بيتقال ده مش هتكسب نص دينك ده أنت هتخسر النص الثانى :)

جوازكم على دماغ أهاليكم مش صح
فاكرين ده جواز أهو ده إللى ضد المنطق فعلاً