إنت مش غريب، وأديك شايف العملية عاملة ازاى، عشان كده، أمانة عليك يا شيخ لما تشوف أى حد شاطر فى شغله أو فى موهبته أو فى أى حاجة بيعملها احترمه، وقدر شغله، وقدر شطارته، لأننا من غير كلام كتير، بنعانى من الفشلة فى كل المجالات تقريبًا.
كل قد إيه بتلاقى سباك شاطر؟ ولا نقاش شاطر؟ ولا كهربائى بيفهم؟ ولا ميكانيكى ما بيخربلكش العربية؟ ولا مدرس ماهر فى مادته، ولا دكتور بيعرف يشخص؟!.. كام مرة جبت 4 و6 و10 صنايعية عشان نفس الحاجة، وكل واحد يشتم فى اللى قبله؟.. تعرف كام واحد اتسرقت منه حاجة وراح بلغ ورجعت؟!.. تعرف كام واحد حصلت له كوارث بسبب الدكاترة والصيادلة ودكاترة الجامعة والنجارين والسمكرية والوزرا والمسؤولين وموظفين الشهر العقارى والسجل المدنى والشغالات فى البيوت والممثلين والمطربين؟
يا أستاذ إحنا من كام سنة كنا فى ديل العالم فى كل حاجة، الدولة رقم 200 وحاجة فى كل حاجة، والحمد لله، دلوقتى خرجنا من الديل، بقينا برة التصنيف أصلًا، إحنا مش موجودين فى الوجود.
فلما ربنا يعترك فى صنايعى كويس، ولا دكتور بيفهم، ولا ظابط شرطة عارف ربنا، ولا شغالة بتعرف تمسح السلم، بوس راسه، إحنا لسه موقعناش بسبب الناس النادرة دى.. أمانة عليك يا شيخ.