هى حكومة الباشمهندس شريف إسماعيل لسه ما اتغيرتش؟!.. آه طبعا، لسه، يعنى بذمتك ممكن نلاقى وزراء شبه الأيام اللى إحنا عايشينها أكتر مثلا من الهلالى الشربينى الهلالى، وزير التعليم؟ ولا حلمى النمنم، وزير الثقافة؟ ولا محمد على مصيلحى، وزير التموين، أعتقد صعب، هؤلاء هم الرجال الأنسب والأليق لشكل الأيام الحالية.
سيبك من التغيير الوزارى، فزيد مثل عبيد، وصدقنى لن تفرق إذا شالوا ألدو أو جابوا شاهين، ففى كل الحالات الوزراء مش لاعبين أصلا، لكن لماذا تمارس فينا الحكومة سياسة «الحفر على الناشف»، طب ع الأقل كلمتين حلوين فى الأول، لماذا لا نغير هذه السياسة العقيمة إلى سياسة «المرهمة»، والتمهيد قبل الفعل، خصوصا إذا كان الفعل بهذا العنف والقسوة والافترا؟!
الإخوة الأفاضل فى حكومة أم الدنيا، هو حضراتكم خرس؟ ولا واكلين سد الحنك؟ ولا مستكبرين تكلموا الناس، كل يومين لعب جديد بمقدرات ومعايش الناس، ورفع لأسعار السلع، ولعب بالجنيه، ورفع للدعم، ومفيش مسؤول يوحد ربنا يطلع يقول للناس هم بيعملوا إيه فى البلد.
الإخوة الأفاضل فى حكومة مصر، الموشكون على الإطاحة بهم إلى غير رجعة، لا تحرمونا على الأقل من خطاب وداع يليق بكم.