مصر جميلة، فأنت لكى تتزوج عاوزلك أقل واجب 300 ألف جنيه.. 200 ألف شقة، و80 ألف عفش، و20 ألف شبكة ومهر، والباقى ممكن يتدبر، يعنى لو بتاخد الحد الأدنى للأجور 1200 جنيه، وصرفت طول الشهر 200 جنيه بس، وحوشت ألف جنيه، يبقى ممكن تتجوز بعد 300 شهر، اللى هما 25 سنة، هو بصراحة إنت ساعتها مش هيبقى فيك حيل للجواز، بس ممكن الورثة يورثوك ويتجوزوا بدالك عادى جدًا.
بس برضه قول الحمد لله، فى الجزائر مهر العروس بيوصل لـ100 مليون سنتيم «زى القرش بتاعنا كده»، وفى الصين بتطلب الأسرة الصينية من العريس مهرًا عبارة عن تجميع 2 كيلو من الذباب لحماية البيئة، وفى تنزانيا بيقدم العريس هناك مهرًا لعروسه عبارة عن أسد يصارعه ثم يصطاده ويقتله، وكلما زاد حجم الأسد زادت نسبة موافقة الأهل على الزيجة، لأنه دليل على قوة العريس، وقدرته على حماية بنتهم.
احمد ربنا، فى جزيرة جاوة العريس لازم يقدم 25 ديل فار مهرًا لعروسته، وفى جزيرة الباسفيك العريس بيجمع أكبر عدد من الفئران «صاحية» ويحطها فى صندوق ويديها للعروسة، الله أعلم بتعمل بيها إيه، وفى إندونيسيا أفورة بقى، العريس لازم يقدم 500 فار بالتمام والكمال.
شفت بقى.. احمد ربنا إنك مصرى، بس خليك برضه عارف إن فى الهند وباكستان العروسة هى اللى بتدفع المهر بدلاً من العريس.
طبعًا لو لم تكن مصريا لوددت طبعًا أن تكون هنديًا أو باكستانيًا.
يا راجل بلا وجع قلب.