الفترة مابين الثمانيات لآوائل القرن العشرين كانت مزدحمة جداً " بأوراق كوتشينة " محدش يعرف مصدرها غير إنه دايماً النظام الحاكم في مصر بيستخدمها زي " عصى موسى " عشان " يكُش " على كل حاجة .. وبشكل او بآخر يجبر الشعب ويرغمه على " الورقة دي " !
أوراق الكوتشينة في النظام المصري هي مجرد فرقعة تعمل اي تخبط سياسي او إجتماعي بغرض إنه " يشوش " على نقصه وضعفه وخيبته اللي طرحت من أكتر من 30 سنة شعب واعي بس مستريح في منطقة الجهل وراضي بيها .. وخوفه مش خوف من النظام على ما قد النظام نفسه قدر يهدم مصدر كلمة " لا " .. لأنه من هدفه إن الشعب يقول " نعم " .. وما أدراكم ما نعم
" نعم " دي لوحدها إتعملها حملة تسويقية تقريباً عدت ميزانية التعليم لمجرد إن الشعب كله يقول " نعم " للدستور، نعم للإستقرار .. وقتها " أوراق الكوتشينة " كلها جاهزة وحاضرة لأي حد يفكر يعمل حاجة غير كدة ... ولو كان يكفي لأي حد فينا على الاقل شرف المحاولة إنه يقول " لا " للدستور ، كان دة يكفي للنظام كلمة في اي جريد صفراء بتخوينك إنتا واللي خلفوك .. يكفي لشدك وراء الشمس تشوف العصفورة
قُلنا " نعم " .. وبخص هنا في " قُلنا " على المجتمع النوبي اللي بنتمي إليه ، واللي ناس كتير عشقت النوبه بأهلها وأرضها وجمالها والوان بيوتها .. رغم إنه تقريباً 3/4 اللي بيظهر في الميديا واللي بيتصور على إنه في النوبه دة لوحده " ورقة كوتشينة " النظام قدر يخلق بيها حالة للناس كلها إن النوبيين عايشين ومرتاحين وبيوتهم ملونة والجو ربيع عندهم .. بمعني أصح فتت الحشد المجتمعي تجاه القضية النوبية لدرجة إن الناس بتحسدنا .. آه والله بتحدسنا على الكدب اللي شافوه في الميديا .. ولك أن تتخيل إننا كنوبيين صدقنا إن دة إحنا .. وصدقنا أكتر مع دستور 2013 / 2014 اللي أقر وقتها بحق النوبيين بالعودة إلى موطنهم الأصلي وتنميتها في 10 سنوات ... كانت فرحة ما بعدها فرحة بإقرار حق العودة.
ومع الموجة قلنا نعم على أمل ان المرة دي مش كدب وإن أخيراً النظام فهم يعني ايه مجتمع كامل عايش بره حدوده وبيفقد كل يوم خصوصيته .. وبقينا صوت واحد في أغنية " إيوّ " النوبية لدعم الدستور ..
والحمد لله الليلة خلصت .. والمشاريب وأتعاب القضاه ومصاريف الورق اللي إتوزع والأغنية اللي إتصورت صاحب الليلة شالها .. وجالنا جواب بعلم الوصول وبقرار من رئيس الجمهورية " طويل العمر يطول عمره وينصره على مين يعاديه " بإن سيادة البيه القاضي قالك إن 16 قرية من قرى النوبه القديمة منطقة حدودية محظورة وتخضع " لبطش" العسكر بطول 110 كيلو متر شرق بحيرة السد و 25 كيلو متر غرب بحيرة السد ، على الرغم إن المنطقة الحدودية بين مصر وإسرائيل من 4 : 5 كيلو متر !!
وبعيداً عن بطلان القرار نفسه المخالف لدستور 2014 .. وبعيداً عن مجلس النواب اللي طبقاً لنفس الدستور رفض خلال المدة القانوينة قانون الخدمة المدينة فقط .. يعني حضرتك كدة إفهم وبدون تفاصيل كتير قانون 444 بإعتبار 16 قرية نوبيه منطقة محظورة تم تمريره.
القضية هنا مش المخالفة القانونية الصريحة للدستور ، ولا قضية مجلس شعب ملهوش لازمة .. القضيّة قضية حق لازم يرجع للنوبين اللي إتهجروا 4 مرات من أراضيهم ..1898بناء أساسات خزان اسوان ، و1902 بناء خزان اسوان ، و1912 بسبب تعلية المياة في الخزان ، و 1934 بسبب التعلية الثانية للخزان ، و أخيرا في عام 1963 لأجل بناء السد العالي " أكبر تهجير حدث في تاريخ مصر بالكامل فتم تهجير أكتر من 100 ألف لخارج الأراضي النوبية "
حضراتكم إشربوا الشاي في مكاتبكم براحتكم .. إفتحوا التليفزيون وشوفوا النوبه بتعتكم .. روحوا مجلس الشعب وإطلعولنا بحاجة نضحك عليها .. ورقة الكوتشينة بتعتكم بإننا خاينين للوطن وعايزين ننفصل مش هتخوفنا .. وبالعربي الفصيح إحنا بنرفض قرار 444
#النوبة_ضد_444